భార్య ఉరేసుకుంటుంటే వీడియో తీసిన భర్త...! పైగా 'అలా కాదు ఇలా' 'ఇలా కాదు అలా' అంటూ సూచనలు..!

ఓ సైకో భర్త కట్టుకున్న భార్యను వేధింపులు గురిచేశాడు. ఆమెను మానసికంగా వేధించి.. ఆత్మహత్యకు ఉసిగొల్పాడు. ఆమె బలవన్మరణానికి పాల్పడబోతే అడ్డుకోకుండా సెల్‌ఫోన్‌లో వీడియో చిత్రీకరిస్తూ ఉరి ఇలా వేసుకోవాలంటూ పైశాచిక ఆనందం పొందాడు. మానసికంగా మరింత కుంగదీశాడు. ఉరి బిగుసుకుని బాధితురాలు దుర్మరణం పాలైంది. కడప జిల్లా రాజంపేట మండలంలోని బోయనపల్లెలో జరిగిన ఈ అమానుష ఘటన తీవ్ర కలకలం రేపింది.

ప్రకాశం జిల్లాకు చెందిన శ్రీరామ్‌ శ్రీనివాస్‌ నందలూరు రైల్వే కేంద్రంలో లోకోపైలట్‌గా పనిచేస్తున్నారు. ఆయన రెండో భార్య కృష్ణవేణి ఇంట్లో ఉరివేసుకుని ఆత్మహత్య చేసుకుంది. అయితే, భార్య ఆత్మహత్య చేసుకుంటుంటే ఆపాల్సిన భర్త, ఆ దృశ్యాలను సెల్‌ఫోన్‌లో చిత్రీకరించాడు. శ్రీరామ్‌ శ్రీనివాస్, కృష్ణవేణి దంపతుల మధ్య తరచూ గొడవలు జరుగుతుండేవి. గురువారం కూడా ఇద్దరి మధ్య తీవ్ర ఘర్షణ జరిగింది. ఈ క్రమంలో మనస్తాపానికి గురైన కృష్ణవేణి ఆత్మహత్య చేసుకుంటానని ఉరితాడు తెచ్చుకుంది. భర్త ఆమెను ఆపడానికి బదులు.. ‘ఉరి అలా కాదు ఇలా', 'ఇలా కాదు అలా' వేసుకోవాలి‘ అంటూ సూచనలు చేస్తూ ఆ ఘటనను తన సెల్‌ఫోన్‌లో రికార్డు చేసినట్లు తెలుస్తోంది. ఘటనా స్థలంలోని సెల్‌ఫోన్‌ ఆధారాలను సేకరించిన పోలీసులు నిందితుడిని విచారణ చేస్తున్నారు. ఈ ఘటనపై ఆగ్రహం చెంది కృష్ణవేణి బంధువులు నిందితుడిపై దాడికి పాల్పడ్డారు. అక్కడే ఉన్న పోలీసులు వారిని అడ్డుకున్నారు. భార్యాభర్తల మధ్య గొడవ జరిగిన సమయంలో కృష్ణవేణి తలుపు వేసుకుని ఆత్మహత్యకు ప్రయత్నించిందని, దానిని భర్త కిటికీలో నుంచి వీడియో తీసినట్లు పోలీసులు వెల్లడించారు.