Jagtial Murder : జగిత్యాలలో దారుణం.. ఐదేళ్ల చిన్నారి గొంతు కోసి హత్య చేసిన దుండగులు

జగిత్యాల జిల్లా కోరుట్ల పట్టణంలోని ఆదర్శనగర్‌లో హృదయాన్ని కలిచివేసే ఘటన చోటుచేసుకుంది. ఐదేళ్ల చిన్నారి హితిక్షను గుర్తు తెలియని దుండగులు గొంతు కోసి హత్య చేశారు. ఈ దారుణ సంఘటన రాష్ట్రవ్యాప్తంగా ఆందోళన కలిగించింది.

జులై 5, 2025 సాయంత్రం, రాములు(Ramulu)-నవీన (Naveena)దంపతుల కూతురైన హితిక్ష (Hitiksha)తన ఇంటి ముందు ఆడుకుంటూ కనిపించకుండా పోయింది. చుట్టుపక్కల ఎంత వెతికినా ఆమె ఆచూకీ లభించకపోవడంతో కుటుంబ సభ్యులు పోలీసులకు ఫిర్యాదు చేశారు. కొంత సమయం తర్వాత, అదే కాలనీలోని ఓ పొరుగు ఇంటి బాత్రూంలో చిన్నారి రక్తపు మడుగులో పడి ఉన్నట్లు గుర్తించారు. ఆమె గొంతు కోసిన గాయాలతో మృతి చెందినట్లు పోలీసులు నిర్ధారించారు.ఘటనాస్థలానికి చేరుకున్న పోలీసులు విచారణ చేపట్టారు. ప్రాథమిక దర్యాప్తులో, ఇంటి యజమాని ఘటన తర్వాత కనిపించకుండా పోయినట్లు తెలిసింది. పోలీసులు అన్ని కోణాల నుంచి ఈ హత్య కేసును విచారిస్తున్నారు. సీసీటీవీ ఫుటేజ్‌లను సేకరించి, సాక్షులను విచారిస్తున్నారు. నిందితులను గుర్తించేందుకు ప్రత్యేక బృందాలను ఏర్పాటు చేశారు.

ఈ ఘటనతో కోరుట్ల పట్టణంలోని ఆదర్శనగర్ ప్రాంతంలో భయాందోళనలు నెలకొన్నాయి. స్థానికులు చిన్నారుల భద్రతపై తీవ్ర ఆందోళన వ్యక్తం చేస్తున్నారు. "ఇలాంటి దారుణ సంఘటనలు మా ప్రాంతంలో జరగడం దిగ్భ్రాంతికరం. పోలీసులు నిందితులను త్వరగా పట్టుకుని కఠినంగా శిక్షించాలి," అని స్థానికులు డిమాండ్ చేస్తున్నారు.