Monalisa: పుసలమ్మాయి పెళ్లి.. లవ్‌ జిహాద్‌ అన్న దర్శకుడు..!

మహాకుంభ్ మేళాలో తీయించుకున్న ఫొటోలతో రాత్రికి రాత్రే ఇంటర్నెట్ సెన్సేషన్‌గా మోనాలిసా మారింది. కేవలం 18 ఏళ్ల వయసులోనే లక్షలాది మంది అభిమానులను సంపాదించిన ఈ యువతి తర్వాత సినీ రంగంలోకి అడుగుపెట్టడం కూడా విశేషంగా మారింది. ఇదిలా ఉండగా తాజాగా మోనాలిసా తన ప్రియుడు ఫ‌ర్మాన్ ఖాన్‌ని వివాహం చేసుకోవడం పెద్ద చర్చకు దారి తీసింది. కుటుంబ సభ్యుల అభ్యంతరాల మధ్య తిరువ‌నంత‌పురంలో పోలీసుల రక్షణ మధ్య ఈ వివాహం జరిగినట్లు తెలుస్తోంది. దాదాపు ఏడాదిన్నరగా ప్రేమలో ఉన్న ఈ జంట ముందుగా సివిల్ మ్యారేజ్ చేసుకుని, అనంతరం ఆలయంలో పెళ్లి చేసుకున్నారు. తన చిరకాల ప్రియుడు ఫర్మాన్ ఖాన్‌ను పెళ్లాడారు. వీరిద్దరూ వేర్వేరు మతాలకు చెందిన వారు కావడంతో, వివాహం పట్ల వ్యతిరేకత వచ్చే అవకాశం ఉందని భావించి కేరళలోని ఒక ఆలయాన్ని వేదికగా చేసుకున్నారు. ఈ జంటకు ప్రాణహాని ఉందన్న సమాచారంతో కేరళ పోలీసులు వారికి పూర్తి స్థాయి భద్రత కల్పించారు. ఆలయ ప్రాంగణంలో పోలీసులు పహారా కాస్తుండగా హిందూ సంప్రదాయం ప్రకారం వీరి వివాహం అత్యంత సరళంగా జరిగింది. ఫర్మాన్ ఖాన్ కూడా ఈ వివాహానికి హిందూ పద్ధతులను అనుసరించడం విశేషం. అయితే ఈ వివాహంపై సనోజ్ మిశ్రా మాట్లాడుతూ, మోనాలిసాను తానే శిక్షణ ఇచ్చి సినీ రంగంలోకి తీసుకొచ్చానని చెప్పారు. ఆమె జీవితాన్ని మార్చేందుకు తాను ఎంతో కష్టపడ్డానని పేర్కొన్నారు. అయితే తన వద్ద పనిచేసిన ఒక వ్యక్తి తర్వాత ఆమెను తప్పుదోవ పట్టించాడని, సౌత్ ఇండస్ట్రీలో ఆమెకు సినిమాల ఒప్పందాలు కూడా అతడే చేయించాడని ఆరోపించారు. ఈ పరిణామాలు తనను తీవ్రంగా నిరాశకు గురిచేశాయని ఆయన వెల్లడించారు.