India vs NZ: రెండో వన్డేకు భారత జట్టులో కీలక మార్పులు..!

భారత్, న్యూజిలాండ్ వన్డే సిరీస్ 2026లో రెండో మ్యాచ్‌కు రంగం సిద్ధమైంది. తొలి వన్డేలో విజయం సాధించి 1-0 ఆధిక్యంలో ఉన్న టీమిండియా బుధవారం రాజ్‌కోట్‌లోని నిరంజన్ షా స్టేడియంలో జరిగే రెండో వన్డేలో సిరీస్‌ను గెలుచుకునేందుకు సిద్ధమవుతోంది. రెండో వన్డేకు ముందు జట్టులో కొన్ని కీలక మార్పులు చోటు చేసుకునే అవకాశాలు కనిపిస్తున్నాయి.

తొలి వన్డేలో వాషింగ్టన్ సుందర్ గాయపడ్డాడు. దీంతో సుందర్ ఈ సిరీస్‌కు దూరం కావడంతో భారత జట్టుకు ఎదురుదెబ్బతాకింది. అంతేకాదు తొలి మ్యాచ్‌కు ముందు రిషభ్ పంత్ గాయపడటంతో అతడిని కూడా జట్టు కోల్పోయింది. ఈ నేపథ్యంలో సెలెక్టర్లు ఢిల్లీ యువ ఆటగాడు ఆయుష్ బదోనీని జట్టులోకి ఎంపిక చేశారు. అయితే హెడ్ కోచ్ గౌతమ్ గంభీర్ వ్యూహానికి అనుగుణంగా ఆల్‌రౌండర్‌గా ఉపయోగపడే నితీశ్ కుమార్ రెడ్డికి అవకాశమివ్వనున్నట్లు తెలిసింది.

ఈ రెండో వన్డే మ్యాచ్ నేడు మధ్యాహ్నం 1:30 గంటలకు ప్రారంభమవుతుంది. స్టార్ స్పోర్ట్స్ నెట్‌వర్క్‌లో మ్యాచ్ ప్రత్యక్ష ప్రసారం అందుబాటులో ఉండగా, జియో హాట్‌స్టార్‌లో లైవ్ స్ట్రీమింగ్ చూడవచ్చు. ఇప్పటివరకు భారత్, న్యూజిలాండ్ మధ్య 121 వన్డేలు జరగగా, భారత్ 63 మ్యాచ్‌లు గెలవగా.. న్యూజిలాండ్ 50 విజయాలు సాధించింది. 7 మ్యాచ్‌లు రద్దు కాగా, ఒక మ్యాచ్ టైగా ముగిసింది.

ఇండియా: శుభ్‌మన్ గిల్ (కెప్టెన్), రోహిత్ శర్మ, విరాట్ కోహ్లీ, శ్రేయస్ అయ్యర్, కేఎల్ రాహుల్ (వికెట్‌కీపర్), రవీంద్ర జడేజా, నితీశ్ కుమార్ రెడ్డి, హర్షిత్ రాణా, కుల్దీప్ యాదవ్, మహమ్మద్ సిరాజ్, ప్రసిద్ధ్ కృష్ణ.