Epstein Files: ఎప్స్టీన్ ఫైల్స్.. ప్రపంచాన్ని కుదిపేసిన లైంగిక నేరాల కేసు..!

ఎప్స్టీన్ ఫైల్స్: ప్రపంచాన్ని కుదిపేసిన లైంగిక నేరాల కేసు..!

ప్రపంచాన్ని కుదిపేసిన లైంగిక నేరాల కేసుల్లో జెఫ్రీ ఎప్స్టీన్ వ్యవహారం అత్యంత సంచలనంగా నిలిచింది. ఇది కేవలం ఒక వ్యక్తి నేరాల కథ మాత్రమే కాదు, ప్రపంచ రాజకీయ, ఆర్థిక, సామాజిక వర్గాలపై తీవ్రమైన ప్రశ్నలు లేవనెత్తిన కేసు.

ఎప్స్టీన్ ఎవరు?

జెఫ్రీ ఎప్స్టీన్ ఒక అమెరికన్ ఫైనాన్షియర్‌. న్యూయార్క్‌లోని డాల్టన్ స్కూల్‌లో గణిత ఉపాధ్యాయుడిగా కెరీర్ ప్రారంభించిన అతను, తరువాత అత్యంత ధనవంతుడైన ఫైనాన్షియల్ అడ్వైజర్‌గా ఎదిగాడు. అతని సంపదపై పూర్తి స్పష్టత లేకపోయినా, అతని కోటరీలో అత్యంత శక్తివంతులైన వ్యక్తులు ఉన్నారు.

మాజీ అమెరికా అధ్యక్షుడు బిల్ క్లింటన్, అమెరికా అధ్యక్షుడు డొనాల్డ్ ట్రంప్, బ్రిటిష్ రాజ కుటుంబ సభ్యుడు ప్రిన్స్ ఆండ్రూ, శాస్త్రవేత్త స్టీఫెన్ హాకింగ్, ఇజ్రాయెల్ మాజీ ప్రధాని ఎహుడ్ బరాక్

క్యారిబియన్ సముద్రంలో ఉన్న Little Saint James అనే ప్రైవేట్ దీవి ఈ కేసులో కీలకంగా మారింది. అక్కడ మైనర్లపై లైంగిక దాడులు జరిగాయని బాధితులు ఆరోపించారు. ఈ దీవి మీడియా వర్గాల్లో “పెడోఫైల్ ఐలాండ్”గా ప్రాచుర్యం పొందింది. అయితే కేసుకు సంబంధించిన అనేక అంశాలు కోర్టు విచారణల ద్వారానే వెలుగులోకి వచ్చాయి. 2005లో ఒక మైనర్ బాలిక చేసిన ఫిర్యాదు ఈ కేసు ప్రారంభమైంది. దర్యాప్తులో అనేక బాలికలు డబ్బు ప్రలోభాలకు గురై దుర్వినియోగానికి గురైనట్లు వెల్లడైంది.

కొంతమంది బాధితులు ఇతర బాలికలను పరిచయం చేయాలని ఒత్తిడి తెచ్చినట్లు ఆరోపణలు ఉన్నాయి. ఇది ఒక నెట్‌వర్క్ మాదిరిగా పనిచేసిందని దర్యాప్తు అధికారులు పేర్కొన్నారు. ఎప్స్టీన్ సహచరురాలిగా గిస్లైన్ మ్యాక్స్‌వెల్ పేరు వెలుగులోకి వచ్చింది. బాలికలను గుర్తించడం, పరిచయం చేయడం, నెట్‌వర్క్ నిర్వహణలో ఆమె పాత్ర ఉన్నట్లు కోర్టు విచారణల్లో తేలింది.

2008లో ఎప్స్టీన్‌కు కేవలం 18 నెలల శిక్ష మాత్రమే పడింది. ఈ తీర్పు వెనుక ఒక రహస్య ఒప్పందం (Non-Prosecution Agreement) ఉందని తరువాత బయటపడింది. బాధితులకు ముందస్తు సమాచారం ఇవ్వకపోవడం, సహచరులకు రక్షణ కల్పించడంపై తీవ్ర విమర్శలు వచ్చాయి. ఈ వ్యవహారం అమెరికా న్యాయవ్యవస్థపై పెద్ద చర్చకు దారి తీసింది.

2018లో మియామీ హెరాల్డ్ జర్నలిస్ట్ జూలీ కె. బ్రౌన్ చేసిన పరిశోధనాత్మక కథనాలు కేసును మళ్లీ జాతీయ స్థాయిలో ముందుకు తెచ్చాయి. దీంతో 2019లో ఎప్స్టీన్ మళ్లీ అరెస్టయ్యాడు. 2019 ఆగస్టులో జైలులో ఉన్న ఎప్స్టీన్ మృతిచెందాడు. అధికారికంగా అది ఆత్మహత్యగా ప్రకటించారు. అయితే జైలు భద్రతా లోపాలు, కెమెరాలు పనిచేయకపోవడం వంటి అంశాలు అనేక అనుమానాలకు దారి తీశాయి. కుట్ర సిద్ధాంతాలు కూడా వెలుగులోకి వచ్చాయి. కానీ ఆత్మహత్యగా నిర్ధారించారు.

ఎప్స్టీన్‌కు సంబంధించిన కోర్టు పత్రాలు, డాక్యుమెంట్లు దశలవారీగా విడుదల అవుతున్నాయి. అయితే అనేక పత్రాలు రెడాక్ట్ చేయబడ్డాయి. కొంతమంది రాజకీయ నాయకులు ఈ ఫైల్స్ పూర్తి స్థాయిలో విడుదల చేయాలని డిమాండ్ చేస్తున్నారు. అదే సమయంలో, సంబంధం ఉన్నంత మాత్రాన నేరంలో ప్రమేయం ఉన్నట్లు భావించరాదని న్యాయ నిపుణులు చెబుతున్నారు. ఎప్స్టీన్ ఫైల్స్ ఒక వ్యక్తి నేరాలకు మాత్రమే పరిమితం కాదు. ఇది అధికారం, డబ్బు, ప్రభావం మరియు న్యాయవ్యవస్థ మధ్య ఉన్న సంబంధాలపై ప్రపంచవ్యాప్తంగా చర్చకు దారి తీసింది.