5th Marriage At Age 90 : 90 ఏళ్ల వయసులో అయిదో పెళ్లి... తన ఆరోగ్య రహస్యం ఇదేనంటున్న ముసలి పెళ్లి కొడుకు

తొంభై ఏళ్ల వయసులో కాటికి కాళ్లు చాపి కూర్చుంటారెవరైనా..! లేదూ కృష్ణా రామా అంటూ మృత్యుదేవత పిలుపుకోసం ఎదురుచూస్తుంటారు.. కానీ ఈయనేంటి...చక్కగా పెళ్లి చేసుకున్నాడు... చేసుకోవడమే కాదు.. తన ఆరోగ్యం రహస్యం పెళ్లేనంటున్నాడు. సౌదీ అరేబియాలో నాదిర్‌ బిన్‌ దహైమ్‌ వాహక్‌ అల్‌ ముర్షీదీ అల్‌ ఓతాబీ అనే వృద్ధుడున్నాడు.. చెప్పాగా.. ఆయన వయసు 90 ఏళ్లు అని! ఈవయసులో అయిదో సారి పెళ్లి కొడుకయ్యాడు. ఆ విధంగా సౌదీలో అత్యధిక వయసు కలిగిన వరుడిగా పేరు తెచ్చుకున్నాడు. ప్రస్తుతం సెంచరీ కొట్టడానికి రెడీ అవుతున్న ఆ వృద్ధుడు తన అయిదో భార్యతో హనీమూన్‌ ట్రిప్‌ను ఎంజాయ్‌ చేస్తున్నాడు. ఇక్కడితో ఆగడట! ఫ్యూచర్‌లో ఇలాగే మరన్ని పెళ్లిళ్లు చేసుకుంటాడట! పెద్ద పేరున్న (అంటే పేరు పెద్దదన్న మాట!) ముసలి పెళ్లి కొడుకుకు సంబంధించిన ఒక వీడియో సోషల్‌ మీడియాలో తెగ వైరల్‌ అవుతోంది. అందులో ఆ వృద్ధ వరుడికి అతిథులు అయిదో పెళ్లి శుభాకాంక్షలు చెబుతున్నారు. వారి విషెస్‌ను ఆ వృద్ధవరుడు అవధుల్లేని ఆనందంతో, కాసింత సిగ్గుతో స్వీకరిస్తున్నాడు. ఇందులోనే ఓ మనువడు తన తాతకు వివాహ శుభాకాంక్షలు చెప్పడం చూడొచ్చు. ఘనత వహించిన ఈ పెళ్లికొడుకుగారు అరేబియా టీవీకి ఇంటర్వ్యూ కూడా ఇచ్చాడు. అందులో అవివాహితులంతా తప్పకుండా పెళ్లి చేసుకోవాలనే సందేశాన్ని ఇచ్చాడు. ఈపెళ్లి తర్వాత కూడా మరో పెళ్లి చేసుకుంటానని చెప్పుకొచ్చాడు. వైవాహిక జీవితం ఎంతో శక్తివంతమైనదని, పెళ్లి చేసుకోవడంవలన జీవితంలో ప్రశాంతత దొరుకుతుందని చెబుతున్నాడు. తాను ఈ వయసులో కూడా ఇంత ఆరోగ్యంగా ఉండటానికి కారణం తాను చేసుకున్న పెళ్లిళ్లేనని తెలిపాడు..