Malta : దయ్యాలను తికమక పెట్టేందుకు గ్రామస్థులేం చేశారు?

దక్షిణ ఐరోపాలో ఓ చిన్న ద్వీప దేశం మాల్టా(Malta). జనాభా ఎంతో ఉండదు.. మహా అయితే అయిదున్నర లక్షలుంటుందేమో! ప్రపంచంలోని అతి చిన్న దేశాల్లో మాల్టా ఒకటి. ఇందులో దాదాపు 360 చర్చిలున్నాయి. టూరిస్టులెవరైనా ఆ దేశానికి వెళ్లి చర్చిలను సందర్శిస్తే మాత్రం డెఫనెట్‌గా కన్‌ఫ్యూజ్‌ అవుతారు. ఎందుకంటే అక్కడుండే ప్రతీ చర్చిపై రెండు గడియారాలుంటాయి.. రెండూ వేర్వేరు సమయాలను చూపిస్తుంటాయి.. ఏది కరెక్టో , ఏది రాంగో తెలియక అయోమయానికి గురవుతారు. అసలెందుకు రెండు గడియారాలు పెడుతున్నారన్నదానికి భిన్న కథనాలు వినిపిస్తాయి. ఇందులో ఏది సరైందో చరిత్రకారులు కూడా చెప్పలేకపోతున్నారు. ఈ విషయంపై ఇప్పటికీ వారు అధ్యయనం చేస్తూనే ఉన్నారు. దయ్యాలను తికమకపెట్టడానికే రెండు గడియారాలను పెడతారన్నది ప్రజల నమ్మకం. చర్చిలో సామూహిక ప్రార్థనలు జరుగుతున్నప్పుడు దయ్యాలు వస్తే అవి అయోమయానికి గురి కావడానికే రెండు గడియారాలట! అంటే తొందరగా వచ్చామో, ఆలస్యంగా వచ్చామో తెలియక తికమకపడతాయన్నది జనం భావన. ప్రజలు మాత్రం గడియారాలు చూసి ప్రార్థనలకు రారు.. చర్చి గంటలు మోగే శబ్దాన్ని బట్టే ప్రార్థనలకు వెళుతుంటారు. రెండు గడియారాలను సమాజంలో ఉన్న వివిధ రకాల వ్యక్తుల కోసం ఏర్పాటు చేశారని కొందరంటున్నారు. ఒకటేమో రైతులకు ఉపయోగపడుతుందట. రైతులు తొందరగా లేచి పొలం పనులకు వెళ్లడానికి గడియారం ఉయోగపడుతుంది. మరో గడియారమేమో జాలర్ల కోసం. కాబట్టి రెండో గడియారం రాంగ్‌ టైమ్‌ను చూపిస్తున్నా జనానికి ఎలాంటి ఇబ్బంది ఉండదట! ఒక గడియారం లోకల్ టైమ్‌ను, మరో గడియారం రోమ్‌ టైమ్‌ను చూపిస్తుందని మరికొందరు అంటుంటారు. దుష్ట ఆత్మలను తరమికొట్టడానికే రెండు గడియారాలను పెట్టారని స్థానిక జానపద సాహిత్యం అంటోంది. 18వ శతాబ్దంలో ఈ సంప్రదాయం మొదలయ్యిందని జానపద సాహిత్యం బట్టి అర్థమవుతోంది. అప్పట్లో మాల్టా గ్రామాన్ని దురదృష్టాలు వెంటాడేవట! పంటలు సరిగ్గా పండేవి కావట! అంటు వ్యాధులు ప్రబలేవట! ఆకస్మిక మరణాలు సంభవించేవట! తమ ఊరికి ఏదో శాపం తగిలిందని, పీడ పట్టుకుందని స్థానికులు నమ్మసాగారు. ఏం చేస్తే ఊరు బాగుపడుతుందో చెప్పమంటూ గ్రామ మతాధికారి దగ్గరకు వెళ్లారు. ఆయన సలహా మేరకు గ్రామ కూడలిలో రెండు గడియారాలు పెట్టారు. అందులో ఒకటి సరైన సమయాన్ని సూచిస్తే, మరోటి ఐదు నిమిషాలు ఫాస్ట్‌గా ఉండేది. ఈ టైమ్‌ తేడా దుష్ట శక్తులను గందరగోళానికి గురి చేస్తుందని మతాధికారి నమ్మాడు. దాంతో అవి గ్రామం విడిచిపోతాయని అనుకున్నాడు. ఊహించినట్టుగానే కొన్నిరోజుల తర్వాత గ్రామంలో మార్పు కనిపించింది. పంటలు బాగా పండాయి. రోగాలు, రోష్టులు లేకుండా పోయాయి. అప్పటి నుంచి మాల్టాకు రెండు గడియారాల గ్రామం అనే పేరు వచ్చింది. అనాదిగా వస్తున్న సంప్రదాయాన్ని ఇప్పటికీ కొనసాగిస్తూ ప్రతి చర్చి దగ్గర రెండు గడియారాలు అమర్చుతున్నారు ప్రజలు. కుడి వైపు అసలు సమయం, ఎడమ వైపు తప్పు సమయం పెడుతున్నారు.