మనమక్కడ నిమిషం కూడా ఉండలేం.. చలికి గడ్డకట్టుకుని పోతాం..నిజంగానే పోతాం.!

చలికాలం వస్తే చాలు బీరువాలో నక్కిన స్వెట్టర్లు.. మఫ్లర్లను బయటకుతీస్తాం.. దుప్పట్లను రెడీ చేసుకుంటాం. ఈమాత్రం చలికే అన్నేసి జాగ్రత్తలు తీసుకుంటాం.. మంచు ప్రదేశాలలో ఉన్నట్లయితే మరిన్ని జాగ్రత్తలు తీసుకుంటాం. అదే ప్రపంచంలోనే అత్యల్ప ఉష్ణోగ్రతలు నమోదయ్యే చోటుకు వెళ్లామే అనుకోండి... వెళితే ఏమవుతుంది..? ఏమవుతుందా..? ఈ స్టోరీ చదవండి...

ప్రపంచంలోనే అత్యంత చల్లటి ప్లేస్‌ రష్యాలో ఉంది. ఆ దేశంలో యాకుత్సుక్‌ అనే చిన్న నగరం ఉంది.. అక్కడి నుంచి కొన్ని కిలోమీటర్లు ప్రయాణిస్తే ఒయంయాకోన్‌ అనే ఊరు వస్తుంది.. సిటీ నుంచి ఒయంయాకోన్‌కు వెళ్లాలంటే కనీసం రెండు రోజులైనా పడుతుంది.. అబ్బో...అక్కడ మనలాంటి వాళ్లు ఉండలేరు.. చలికి గడ్డకట్టుకునిపోతాం... నిజంగానే పోతాం! అంత చలి ఉంటుందక్కడ.. నార్మల్‌ డేస్‌లోనే మైనస్‌ 30 డిగ్రీల టెంపరేచర్‌ ఉంటుంది.. ఇక చలికాలం వస్తే మైనస్‌ 71కి వెళ్లిపోతుంది.. మనం పది డిగ్రీల టెంపరేచర్‌కే గజగజమని వణికేస్తాం..అలాంటిది మైనస్‌లో ఉంటే ఉండగలమా?

మనకు ఇబ్బందే కానీ.. అక్కడివాళ్లు మాత్రం ఆ వాతావరణానికి.. ఆ టెంపరేచర్‌కు అలవాటుపడ్డారు.. ఇప్పుడు కాదుకానీ.. 1924లో అక్కడ మైనస్‌ 71 డిగ్రీల ఉష్ణోగ్రత నమోదయ్యింది.. ఈ భూమ్మీద ఇప్పటి వరకు నమోదైన అత్యంత కనిష్ట ఉష్ణోగ్రత అదే! అందుకే ఆ ఊరు రికార్డులోకి ఎక్కింది.. తదనంతరం ఆ టెంపరేచర్‌ను సూచిస్తూ ఆ ఊళ్లో ఓ బోర్డు కూడా పెట్టారు.. దానికి పోల్‌ ఆఫ్‌ కోల్డ్‌ అనే పేరు పెట్టారు. ఆ గ్రామంలో దాదాపు 500 కుటుంబాలు నివసిస్తున్నాయి.. అక్కడున్నవారందరికీ పశుమాంసమే ఆహారం.. రోజూ మాంసం తింటున్నా వారి ఆరోగ్యానికి ఎలాంటి ఢోకా ఉండదు. ఆ ఊళ్లో ఉన్నది ఒకే ఒక షాపు.. అందులో ఊళ్లోవాళ్లకు కావలసినవన్నీ దొరుకుతాయి.

విచిత్రమేమిటంటే అంత చలి ప్రదేశంలోనూ ఓ వేడి నీటి సరస్సు ఉండటం.. ఆ సరస్సులోనే పశువులను సుబ్బరంగా కడుగుతారు.. ఆ తటాకం నుంచి పాయలుగా వచ్చే వేడి నీటిని స్థానికులు ఉపయోగిస్తారు.. ఒయంయాకోన్‌ ప్రజలకు కరెంటు.. వేడిని అందించేందుకు ఓ పవర్‌స్టేషన్‌ ట్వంటీఫోర్‌ ఇంటూ సెవెన్‌ పని చేస్తూ ఉంటుంది. ఓ నాలుగైదు గంటలు ఆ పవర్‌స్టేషన్‌ పనిచేయకపోతే ప్రజలు అల్లాడిపోతారు.. అంతటి చలి ప్లేస్‌లో ఉండటం చాలా చాలా కష్టం.. అక్కడ సెల్‌ఫోన్‌లు పనిచేయవు.. సెల్‌ఫోన్‌లేమిటి.. ఇంకు పెన్ను కూడా పని చేయదు.. ఎందుకంటే ఇంకు గడ్డకట్టుకుపోతుంది కాబట్టి.. ఇక వెహికిల్స్‌ను ఎప్పుడూ ఆన్‌లోనే పెట్టాల్సి ఉంటుంది.. ఒక్కసారి ఇంజన్‌ను ఆఫ్‌ చేస్తే మళ్లీ ఆన్‌ చేయడం కష్టం..

మృతదేహాలను పూడ్చిపెట్టడానికి గొయ్యి తవ్వాలన్నా మూడు రోజులు పడుతుంది.. ఎందుకంటే పైనున్న మంచునంత కరగించాలి కదా! అందుకోసం మంచుపై రెండు రోజుల పాటు మంటపెట్టి ఉంచుతారు.. అన్నట్టు మరో సంగతేమిటంటే వింటర్‌లో అక్కడ పగలెక్కువగా ఉండదు.. మహా అయితే ఓ మూడు గంటలపాటు సూర్యుడుంటాడు.. అదే వేసవిలో అయితే 21 గంటలపాటూ మనం సూర్యుడిని చూడొచ్చు.. అయితేనేం చలి చలే! ఈ కూలెస్ట్‌ ప్లేస్‌ను చూట్టానికి కూడా పర్యాటకులు వస్తున్నారు.. అది కూడా ఈ మధ్య కాలంలోనే! ఒయంయాకోన్‌ పర్యాటక ప్రదేశంగా మారడంతో స్థానికులకు నాలుగు డబ్బులు సమకూరుతున్నాయి..