Mood of the Nation Survey 2025 : ఇప్పటికిప్పుడు ఎన్నికలు వస్తే..!

దేశంలో మరోసారి బీజేపీ నేతృత్వంలోని ఎన్డీఏ అధికారంలోకి రానుందా.. 12 ఏళ్లుగా అధికారం కోసం ఎదురుచూస్తున్న కాంగ్రెస్‌ పార్టీకి మరోసారి ఎదురుదెబ్బలు తప్పవా. రాహుల్‌ గాంధీ మరో ఐదేళ్లపాటు విపక్షంలోనే కొనసాగాలా?. అంటే అవుననే అంటున్నది ఇండియా టుడే-సీ వోటర్‌ ‘మూడ్‌ ఆఫ్‌ ద నేషన్‌’ సర్వే. దేశంలో ఇప్పటికిప్పుడు లోక్‌సభ ఎన్నికలు జరిగితే అధికార బీజేపీ నేతృత్వంలోని ఎన్డీయేకు 324 సీట్లు దక్కించుకుంటుందని సర్వేలో తేలింది. విపక్ష కాంగ్రెస్‌ నేతృత్వంలోని ఇండియా కూటమికి 208 స్థానాలు మాత్రమే దక్కే అవకాశం ఉందని స్పష్టమైంది. ఈ ఏడాది జూలై 1 నుంచి ఆగస్టు 14 దాకా ఈ సర్వేను నిర్వహించారు. ఇందులో భాగంగా దేశవ్యాప్తంగా వివిధ లోక్‌సభ నియోజకవర్గాల్లో 54,788 మందిని ప్రశ్నించారు. సీవోటర్‌ రెగ్యులర్‌ ట్రాకర్‌ డేటా ద్వారా మరో 1,52,038 మంది అభిప్రాయాలు సేకరించారు. మొత్తంగా 2,06,826 మంది అభిప్రాయాలను పరిగణనలోకి తీసుకుని సర్వే నివేదికను రూపొందించారు. దీనిద్వారా లోక్‌సభకు ఇప్పుడు ఎన్నికలు జరిగితే ఎన్డీఏ మళ్లీ ఘన విజయం సాధించడం ఖాయమని వెల్లడైంది. పార్టీల పరంగా చూస్తే బీజేపీకి సొంతంగా 260 సీట్లు, కాంగ్రెస్‌కు 97 సీట్లు రానున్నాయి. 2024 ఎన్నికల్లో ఎన్డీయేకు 44 శాతం ఓట్లు లభించగా, ఇప్పుడు 46.7 శాతం ఓట్లు, ఇండియా కూటమికి 40.9 శాతం ఓట్లు లభిస్తాయని సర్వేలో వెల్లడించారు.