రిటైర్మెంటు డబ్బుతో గ్రామానికి తాగునీరు.. ఒడిశా టీచర్‌ ఆదర్శం

ఒడిశాకు చెందిన ఓ ఉపాధ్యాయుడు పదవీ విరమణ నాడు.. తాను టీచర్‌గా పనిచేసిన గ్రామాన్ని నీటిసంక్షోభం నుంచి గట్టెక్కించారు. పురీ జిల్లాలోని అస్తరంగ్‌ బ్లాకు పట్సుందర్‌పుర్‌ గ్రామ ఉన్నత పాఠశాలలో మాగుని మల్లిక్‌ 18 ఏళ్లపాటు టీచర్‌గా పనిచేశారు. ఈ గ్రామస్థులు తాగునీటి కోసం 4 కిలోమీటర్లు నడిచి వెళ్లడం ఆయన తరచూ గమనించేవారు. గ్రామంలోని నీటి ట్యాంకు నిరుపయోగంగా మారింది. గ్రామస్థులు పలుమార్లు ప్రభుత్వ అధికారులకు మొరపెట్టుకున్నా ఫలితం లేకపోయింది. ఈ నేపథ్యంలో తన ఉద్యోగ విరమణ నాడు మల్లిక్‌ కీలక నిర్ణయం తీసుకున్నారు. రిటైర్మెంటుతో వచ్చిన డబ్బు, దాచుకున్న సొమ్ము కలిపి రూ.10 లక్షల ఖర్చుతో నీటి ట్యాంకుకు మరమ్మతు చేయించి, ఆక్వా గార్డ్‌ను అమర్చారు. చాలా ఇళ్లకు కొళాయిలు ఏర్పాటు చేయించారు.