ICC T-20 Rankings: టి-20ల్లో అభిషేక్‌దే టాప్‌ ప్లేస్..! ఐసీసీ తాజా ర్యాంకింగ్స్‌..! టాప్‌-10లో ఎవరున్నారంటే..!

టి-20 వరల్డ్‌ కప్‌ ఇంకో మూడు రోజుల్లో ప్రారంభం కానుండగా ఐసీసీ తాజాగా టి-20 ర్యాంకులను ప్రకటించింది. తొలి బంతికే సిక్స్ కొట్టాలన్న కసితో ఉండే అభిషేక్‌కు ఈ ర్యాంకింగ్స్‌లో తొలి స్థానం దక్కింది. ఇటీవలే న్యూజిలాండ్‌తో జరిగిన ఐదు టీ20 సిరీస్‌లో రెండు మ్యాచుల్లో విఫలమై పాయింట్లు కోల్పోయినప్పటికీ.. 917 పాయింట్లతో అగ్రస్థానం అభిషేక్ శర్మకే దక్కింది.

అభిషేక్ శర్మ తర్వాత 834 పాయింట్లతో ఫిల్ సాల్ట్ రెండో స్థానంలో నిలిచాడు. మూడో స్థానంలో జోస్ బట్లర్ 769 పాయింట్లతో ఉన్నాడు. అయితే న్యూజిలాండ్‌తో జరిగిన ఐదు టీ20ల సిరీస్‌కు దూరమైన తిలక్ వర్మ.. తాజా ర్యాంకింగ్స్‌లో నాలుగో స్థానానికి పడిపోయాడు. గత నెలలో సర్జరీ కారణంగా జట్టుకు దూరమైన తిలక్ వర్మ ప్రస్తుతం పూర్తిగా కోలుకున్నాడు. అమెరికాతో భారత్ 'ఏ' జట్టు ఆడనున్న వార్మప్ మ్యాచ్‌లో ఫిట్‌నెస్ నిరూపించుకున్న అనంతరం ప్రధాన జట్టులో చేరనున్నాడు. సరైన సమయంలో ఫామ్‌లోకి వచ్చిన భారత టీ20 కెప్టెన్ సూర్యకుమార్ యాదవ్ కూడా తాజా ర్యాంకింగ్స్‌లో ఆరో స్థానానికి ఎగబాకి 728 రేటింగ్ పాయింట్లు సాధించాడు. అయితే ఇషాన్‌ కిషన్‌ కూడా పాయింట్ల పట్టికలో 32 స్థానాలు ఎగబాకాడు. ప్రస్తుతం 32వ స్థానంలో ఉన్నాడు. ప్రపంచ కప్‌ ఆరంభంలో ఇషాన్‌కు అవకాశం దొరికితే టాప్-10లోకి కూడా దూసుకొచ్చే అవకాశం ఉందంటున్నారు క్రికెట్ విశ్లేషకులు..!

టీమిండియా స్టార్ బ్యాటర్ వికెట్ కీపర్ ఇషాన్ కిషన్ తాజా ఐసీసీ ర్యాంకింగ్స్‌లో మెరుపు వేగంగా దూసుకొచ్చాడు. న్యూజిలాండ్‌తో ఐదు టీ20ల సిరీస్‌లో సెంచరీ సాధించిన ఇషాన్.. ఏకంగా 32 స్థానాలు ఎగబాకి 32వ ప్లేస్‌కి చేరుకున్నాడు. ప్రపంచ కప్ గ్రూప్ దశలో భారత తుది జట్టులో చోటు దక్కితే వచ్చే రెండు వారాల్లోనే ఇషాన్ టాప్ 10లోకి చేరే అవకాశాలు ఉన్నట్లు విశ్లేషకులు భావిస్తున్నారు.