Womens Premier League - 2024 : ఉమెన్స్ ప్రీమియర్ లీగ్ వ‌చ్చేస్తుంది.. డేట్‌, టైం, వేదిక‌లివిగో..

మహిళల ప్రీమియర్ లీగ్ (WPL) రెండో సీజన్ ఫిబ్రవరి 23న ప్రారంభం కానుంది. బెంగళూరులోని ఎం చిన్నస్వామి స్టేడియంలో డిఫెండింగ్ ఛాంపియన్ ముంబై ఇండియన్స్, ఢిల్లీ క్యాపిటల్స్ మధ్య తొలి మ్యాచ్ జరగనుంది. ఈ మ్యాచ్‌కు ముందు బీసీసీఐ అత్యద్భుతమైన ప్రారంభోత్సవ కార్య‌క్ర‌మాన్ని నిర్వహించనుంది. దీనికి బాలీవుడ్ ప్ర‌ముఖులు హాజ‌రుకానున్నారు. ప్రారంభోత్సవ వేడుకలో ప్రముఖ నటుడు కార్తీక్ ఆర్యన్ ప్రదర్శన ఇవ్వనున్నారు.

ప్రారంభోత్సవ వేడుక ఫిబ్రవరి 23 సాయంత్రం 6:30 గంటలకు ప్రారంభమవుతుంది. కార్తీక్ ఆర్యన్‌తో పాటు పలువురు బాలీవుడ్ స్టార్స్ ఇందులో కనిపిస్తారు. చివరిసారి కియారా అద్వానీ, కృతి సనన్ వంటి తారలు ప్రారంభోత్సవ వేడుకలో ప్రదర్శన ఇచ్చారు. గాయకుడు AP ధిల్లాన్ తన పాటలతో అభిమానుల హృదయాలను గెలుచుకున్నాడు.

టోర్నీ ఫిబ్రవరి 23 నుంచి మార్చి 17 వరకు జరగనుంది. గతేడాది మాదిరిగానే మొత్తం ఐదు జట్లు 22 మ్యాచ్‌లు ఆడనున్నాయి. గత ఏడాది ఈ లీగ్‌ను ముంబై, నవీ ముంబైలోని రెండు స్టేడియంలలో నిర్వ‌హించారు. ఈసారి లీగ్‌కు ఆతిథ్యం ముంబైకి బదులుగా బెంగళూరు, ఢిల్లీకి మార్చ‌బ‌డింది.

టోర్నీలో తొలి 11 మ్యాచ్‌లు బెంగళూరులో జరగనున్నాయి. ఆ త‌ర్వాత మొత్తం ఐదు జట్లు ఢిల్లీకి వస్తాయి. అక్కడ ఎలిమినేటర్‌తో సహా చివరి మ్యాచ్ జ‌రుగుతుంది. లీగ్ రౌండ్‌లో 20 మ్యాచ్‌లు జరుగుతాయి. దీని తర్వాత ఎలిమినేటర్, ఫైనల్ మ్యాచ్‌లు ఉంటాయి. లీగ్ రౌండ్‌లో అగ్రస్థానంలో నిలిచిన జట్టు నేరుగా ఫైనల్‌కు చేరుకుంటుంది. కాగా, రెండు, మూడు స్థానాల్లో నిలిచిన జట్లు ఎలిమినేటర్‌ను ఆడతాయి. 24 రోజుల పాటు జరిగే ఈ టోర్నీలో ఒక్క డబుల్ హెడర్ మ్యాచ్ కూడా జరగదు. ప్రతిరోజూ ఒక మ్యాచ్ మాత్రమే ఉంటుంది. ఎలిమినేటర్ మార్చి 15న, ఫైనల్ మార్చి 17న ఢిల్లీలో జరగనుంది.