KTR : దయచేసి హైదరాబాద్‌లో పెట్టుబడులు పెట్టండి.. KTR విజ్ఞప్తి..!

OpenAI తన కార్యకలాపాలు ప్రారంభించడానికి హైదరాబాద్ అన్ని రకాల సౌకర్యాలు ఉన్నాయి…ఇక్కడి నుంచి భారత దేశ కార్యకలాపాలను ప్రారంభించాలని ఓపెన్ ఏఐ సి ఈ ఓ సామ్ ఆల్ట్‌మన్‌కి కేటీఆర్ విజ్ఞప్తి. భారత దేశంలో త్వరలో కార్యాలయం ఏర్పాటు చేస్తామని చెప్పిన OpenAI CEO అయిన సామ్ ఆల్ట్‌మన్‌కి హైదరాబాద్ నుంచి కంపెనీ కార్యకలాపాలు ఏర్పాటు చేయాలని మాజీ ఐటీ మరియు పరిశ్రమల శాఖ మంత్రి భారత రాష్ట్ర సమితి వర్కింగ్ ప్రెసిడెంట్ కేటీఆర్ స్వాగతం పలికారు. కేటీఆర్ తన ట్వీట్‌లో, వచ్చేనెల భారత్లో పర్యటిస్తున్నానని తెలిపిన సామ్ ఆల్ట్‌మన్‌కి హైదరాబాద్ నగరానికి స్వాగతం పలికారు.

హైదరాబాద్‌ను భారతదేశానికి సరైన ప్రవేశ ద్వారంగా, మరియు OpenAI లాంటి సంస్థలకు ఆదర్శవంతమైన కేంద్రంగా అభివర్ణించారు. ఈ నగరం భారతదేశంలోనే అత్యంత శక్తివంతమైన ఇన్నోవేషన్ పర్యావరణ వ్యవస్థను కలిగి ఉందని, ఇందులో T-Hub, WE-Hub, T-Works, తెలంగాణ స్టేట్ ఇన్నోవేషన్ సెల్, మరియు రీసెర్చ్ అండ్ ఇన్నోవేషన్ సర్కిల్ ఆఫ్ హైదరాబాద్ వంటివి ఉన్నాయని తెలిపారు. హైదరాబాద్ ఇప్పటికే మైక్రోసాఫ్ట్, గూగుల్, అమెజాన్, మెటా, ఆపిల్, క్వాల్‌కామ్ లాంటి అనేక గ్లోబల్ టెక్ దిగ్గజాలకు కేంద్రంగా మారిందని, ఇక్కడ సాంకేతిక మరియు స్టార్టప్ రంగాలలో అపారమైన ప్రతిభ ఉందని ఆయన పేర్కొన్నారు.

గత దశాబ్ద కాలంగా తెలంగాణ ప్రభుత్వం, భారతదేశానికి AI రాజధానిగా రాష్ట్రం మారడానికి అనేక సాహసోపేతమైన చర్యలు తీసుకుందని, ఇందులో 2020ని "ఇయర్ ఆఫ్ AI" గా ప్రకటించడం మరియు అనేక AI-ఆధారిత కార్యక్రమాలను ప్రోత్సహించడం వంటివి ఉన్నాయని వెల్లడించారు. హైదరాబాద్ నగరంలో ఉన్న ప్రతిభ, ఇన్నోవేషన్, నూతన ఆవిష్కరణలు, మరియు గ్లోబల్ కనెక్టివిటీల కలయికతో AI విప్లవాన్ని ముందుకు నడిపిస్తుందని ఆయన నొక్కి చెప్పారు.