KTR : సోషల్ మీడియాలో కేసీఆర్ ఫొటోను షేర్ చేసిన కేటీఆర్

'IYKYK' అంటూ ఆసక్తికరమైన క్యాప్షన్ జోడించి కేసీఆర్ కాళ్ల వద్ద కుక్క ఉన్న ఫొటోపై చర్చ జరుగతోంది. ట్వీట్ వెనుక ఉద్దేశంపై నెటిజన్ల మధ్య ఊహాగానాలు వస్తున్నాయి. బీఆర్ఎస్ పార్టీ వర్కింగ్ ప్రెసిడెంట్ కేటీఆర్ సోషల్ మీడియాలో చేసిన ఒక పోస్ట్ ఇప్పుడు రాజకీయ వర్గాల్లో తీవ్ర చర్చనీయాంశంగా మారింది. తన తండ్రి, పార్టీ అధినేత కేసీఆర్‌కు సంబంధించిన ఓ ఆసక్తికరమైన ఫొటోను ఆయన పంచుకోవడమే ఇందుకు కారణం. కేటీఆర్ తన ట్విట్టర్ ఖాతాలో కేసీఆర్ ఫొటోను పోస్ట్ చేశారు. ఆ ఫొటోలో కేసీఆర్ మెడలో గులాబీ కండువాతో ఓ కుర్చీలో కూర్చుని ఉండగా, ఆయన కాళ్ల వద్ద ఓ శునకం కూర్చుని ఉంది. ఈ ఫొటోకు ఆయన 'IYKYK' అనే చిన్న క్యాప్షన్ జోడించారు. 'If You Know, You Know' అనే ఆంగ్ల వాక్యానికి ఇది సంక్షిప్త రూపం. "తెలిసిన వాళ్లకు దీని గురించి ప్రత్యేకంగా చెప్పనవసరం లేదు" అనే అర్థాన్ని ఇది సూచిస్తుంది. ఈ పోస్ట్ సోషల్ మీడియాలో వైరల్‌గా మారింది. కేటీఆర్ ఈ ఫొటోను ఇప్పుడు ఎందుకు పంచుకున్నారు? ఈ క్యాప్షన్ వెనుక ఉన్న అంతరార్థం ఏంటి? అంటూ నెటిజన్లు రకరకాల ఊహాగానాలతో కామెంట్లు చేస్తున్నారు. కొందరు రాజకీయ కోణంలో విశ్లేషిస్తుండగా, మరికొందరు తమకు తోచిన విధంగా అర్థాలు చెబుతున్నారు. మొత్తానికి, ఎలాంటి వివరణ లేకుండా కేటీఆర్ పెట్టిన ఈ ఒక్క పోస్ట్ బీఆర్ఎస్ శ్రేణులతో పాటు రాజకీయ వర్గాల్లోనూ తీవ్రమైన క్యూరియాసిటీని రేకెత్తించింది. దీనిపై నెటిజన్ల నుంచి భారీగా స్పందన వస్తోంది.!