HarishRao Fires on Revanth Sarkar: హార్వర్డ్‌లో రేవంత్‌ కాస్ట్‌లీ క్లాస్‌లు..! గురుకుల విద్యార్థులకు పాము కాట్లు: హరీష్‌రావు

మహబూబాబాద్ జిల్లా ఇనుగుర్తి మండలంలోని సాంఘిక సంక్షేమ బాలికల కళాశాలలో ఇంటర్ ఫస్ట్ ఇయర్ చదువుతున్న అష్మిత అనే విద్యార్థినికి పాము కాటు. పరిస్థితి విషమించడంతో మహబూబాబాద్ ప్రభుత్వ ఆసుపత్రికి తరలించిన సిబ్బంది. విద్యార్థినికి పాము కాటుపై మాజీ మంత్రి హరీష్‌రావు ధ్వజమెత్తారు. ఎక్స్‌ వేదికగా రేవంత్‌ ప్రభుత్వాన్ని ఎండగట్టారు. ఈ సందర్భంగా ఎక్స్‌లో పోస్ట్ చేస్తూ..

'' హార్వర్డ్‌లో సీఎం కాస్ట్‌లీ చదువు.. గురుకుల విద్యార్థులకు పాము కాట్లు, ఇంటిగ్రేటెడ్ స్కూల్స్ సంగతి దేవుడెరుగు ఉన్న గురుకులాల పరిస్థితి అధ్వాన్నం చేశారు, పాము కాటుకు గురై ఆసుపత్రిలో చేరిన గురుకుల బిడ్డ ప్రాణానికి రేవంత్ రెడ్డిదే పూర్తి బాధ్యత, మహబూబాబాద్ జిల్లా ఇనుగుర్తి గురుకులంలో ఇంటర్ విద్యార్థిని అశ్మిత పాముకాటుకు గురై మృత్యువుతో పోరాడుతున్న వార్త కలచివేస్తోంది. రేవంత్ రెడ్డి గారు, మీ పాలనలో గురుకులాలు విద్యా నిలయాలా.. లేక విషసర్పాలకు ఆవాసాలా.. ముఖ్యమంత్రిగా, విద్యాశాఖ మంత్రిగా ఇది మీ పరిపాలనా వైఫల్యం కాదా?

20 వేల కోట్లతో ఇంటిగ్రేటెడ్ స్కూల్స్ అంటూ రంగుల లోకం చూపిస్తున్న మీరు గురుకులాలను గాలికి వదిలేయడం సిగ్గుచేటు. గురుకులాల్లో పిచ్చి మొక్కలు తొలగించే దిక్కు లేదు. చిమ్మచీకట్లో లైట్లు వేసే నాథుడు లేడు. అపరిశుభ్రత కారణంగా నేడు గురుకులాల్లో కుక్క కాట్లు, పాము కాట్లు సర్వసాధారణంగా మారిపోవడం అత్యంత దుర్మార్గం. గురుకుల బిడ్డలకు కడుపు నిండా తిండి లేదు.. ప్రాణాలకు రక్షణ లేదు. ముఖ్యమంత్రి హార్వర్డ్ యూనివర్సిటీకి వెళ్లి విదేశాల్లో ఫోటోలకు పోజులిస్తే...ఇక్కడ పేద విద్యార్థులు ఆసుపత్రి పాలై కొట్టుమిట్టాడుతున్నారు. తమ పిల్లలు గురుకులాలకు చదువుకోవడానికి వెళ్తున్నారా? లేక చావుతో పోరాడటానికి వెళ్తున్నారా అని తల్లిదండ్రులు ఆవేదన చెందుతున్నారు. ప్రభుత్వం ఇప్పటికైనా మొద్దు నిద్ర వీడి పతనమవుతున్న గురుకులాలను కాపాడాలి. విద్యార్థుల భవిష్యత్తును నిలబెట్టాలి. అశ్మితకు తక్షణమే మెరుగైన వైద్యం అందించాలి. రేవంత్ రెడ్డి గారు.. రాజకీయ కక్షసాధింపుల మీద ఉన్న శ్రద్ధలో కొంత అయినా పేద పిల్లల బతుకుపై పెట్టండి'' అంటూ ట్విట్టర్‌లో హరీష్‌రావు మండిపడ్డారు.