ట్విన్స్‌ డే ట్విన్స్‌-ట్విన్స్‌ పెళ్లి.. ఇంతలోనే ట్విస్ట్..!

ఇటీవల ట్విన్స్ డే రోజు ట్విన్స్‌ను పెళ్లాడిన కవలల్లో ఓ యువకుడు ఆత్మహత్య చేసుకున్నాడు. పెళ్లి జరిగి నెల రోజులే కావడం, ఇంతలోనే ఓ యువకుడు ఆత్మహత్య చేసుకోవడంతో ఆ ఇంట్లో తీవ్ర విషాదం చోటు చేసుకుంది. కామారెడ్డి జిల్లా మాచిరెడ్డి మండలం ఘనపూర్ గ్రామంలో ఈ ఘటన జరిగింది. వివరాల్లోకి వెళ్తే ఇటీవల ట్విన్స్ డే రోజు కవలలను పెళ్లాడిన కవలల్లో ఓ వరుడు ఆత్మహత్యకు పాల్పడ్డాడు. హైదరాబాద్ నగరంలోని ఓ కంపెనీలో సాఫ్ట్‌వేర్ ఉద్యోగం చేస్తున్న దుంపటి వినయ్ కుమార్ (31) ఉగాది నాడు ఇంటి నుంచి వెళ్లి తిరిగి రాలేదు.

అతడి కోసం బంధువులు గాలిస్తుండగా.. గంభీరావుపేట మండలం నర్మాల వద్ద ఉన్న మానేరులో దూకి ఆత్మహత్య చేసుకున్నట్లు గుర్తించారు. కేసు నమోదు చేసుకున్న పోలీసులు వినయ్ మృతికి గల కారణాలు తెలియరాలేదు. కాగా, దుంపటి విజయ్, వినయ్ ఇద్దరు కవల సోదరులు. వీరి పోలికలు ఒకేలా ఉంటాయి. వీరి కోసం సంబంధాలు వెతుకుతున్న క్రమంలో తాడ్వాయి మండలం దేమి కలాన్ గ్రామానికి చెందిన కుమ్మరి కీర్తన, కీర్తి అనే కవల సోదరీమణుల గురించి తెలిసింది. రూపురేఖలు, గుణగణాలు కలవడంతో పెద్దలు పెళ్లి నిశ్చయించి ఒకే ముహూర్తానికి పెళ్లి జరిపించారు. విజయ్-కీర్తన, వినయ్‌-కీర్తి పెళ్లి ఘనంగా జరిగింది. పెళ్లి జరిగి నెల కూడా తిరక్కుండానే కీర్తి భర్త వినయ్‌ ఆత్మహత్య చేసుకోవడంతో ఆ కుటుంబంలో తీవ్ర విషాదం నెలకొంది