Finance Torture : ఫైనాన్స్‌ సంస్థ ఏజెంట్ల వేధింపులు, కోపంతో బైక్‌కు నిప్పు పెట్టిన యువకుడు!

ఓ ప్రైవేటు ఫైనాన్స్‌ సంస్థ(Private finance organisation) నుంచి లోన్‌ తీసుకుని బైక్‌(Bike) కొన్నాడో యువకుడు. ప్రతి నెల ఈఎంఐ(EMI) కడుతూ వచ్చాడు. పాపం ఆర్ధిక సమస్యల కారణంగా ఈ నెల మాత్రం కట్టలేకపోయాడు. దాంతో ఆ ప్రైవేటు సంస్థ వేధింపులకు గురి చేసింది. వాటిని తట్టుకోలేక ఆ యువకుడు బైక్‌నే తగులబెట్టాడు. ఈ ఇన్సిడెంట్‌ మెదక్‌ జిల్లా శివంపేటలో జరిగింది. ఒక్క నెల ఈఎంఐ కట్టకపోయే సరికి ఆ యువకుడికి ఫైనాన్స్‌ సంస్థ ఏజెంట్ల నుంచి కాల్స్‌ రావడం మొదలయ్యాయి. కొంచెం సమయం ఇస్తే కట్టేస్తానని ఎంత చెప్పినా వారు వినలేదు. చివరకు ఆ యువకుడి ఇంటికి కూడా వచ్చారు. ఈఎంఐ కట్టాలని నానా గొడవ చేశారు. దాంతో మనోవేదనకు గురైన ఆ యువకుడు ఫైనాన్స్‌ సంస్థ ఏజెంట్ల ముందే బైక్‌కు నిప్పు పెట్టాడు. బైక్‌ మంటల్లో పూర్తిగా కాలిపోయింది. దాంతో అక్కడ ఉద్రిక్తత చోటు చేసుకుంది. పోలీసులు అక్కడికి వచ్చి కేసు నమోదు చేశారు.